RSI - გაყიდვა - გაქირავების ინდექსი

ინდექსი შემუშავებულია SavvY Valuation-ის გუნდის მიერ. SavvY Valuation წარმოადგენს SavvY -ის შეფასების დეპარტამენტს და მომსახურებას გასწევს ორი ძირითადი მიმართულებით: მატერიალური და არამატერიალური ქონების შეფასება, შეფასების საერთაშორისო სტანდარტების (IVS) მიხედვით და ძირითადი საშუალებების რეესტრის მართვა. ინდექსის შემუშავების იდეა უძრავი ქონების ბაზრის შესახებ ანალიტიკური მონაცემების სიმწირის შედეგად წარმოიშვა. მოცემული მიმართულებით ცალკეული კვლევების არსებობის მიუხედავად ბაზრის მოცემული სეგმენტი არასაკმარისადაა შესწავლილი. ყოველი ახალი ანალიტიკური მონაცემი კი ამარტივებს ბაზარზე არსებული ვითარების შესახებ ზოგადი წარმოდგენის შექმნის შესაძლებლობას.

მოცემული მაჩვენებელი ისევე როგორც, ნებისმიერი აგრეგირებული სიდიდე ბუნებრივია ვერ აღწერს ბაზარზე არსებულ ვითარებას დეტალურად და მხოლოდ ზოგადი წარმოდგენის შექმნის შესაძლებლობას იძლევა, თუმცა არსებული ტენდენციის დანახვას შესაძლებელს ხდის. კონკრეტულად ინდექსი ცალკეული უბნებისათვის კომერციული ფართების საშუალო შეწონილი საიჯარო ქირისა და საშუალო შეწონილი გასაყიდი ფასის ფარდობას წარმოადგენს. რაც თავის მხრივ არის კაპიტალიზაციის განაკვეთის ერთგვარი შემფასებელი. ინტერპრეტაციიდან გამომდინარე, ეს მიმართება გვაწვდის ზოგად ინფორმაციას იჯარით აღებისას რა დროში მოგვიწევს იგივე ნომინალური თანხის გადახდა რაც შესყიდვისთვის იქნებოდა საჭირო, ან იჯარასა და ყიდვას შორის არჩევანისას რომელი მათგანია მეტად ხელსაყრელი.

ინდექსი ასახავს 2018 წლის IV კვარტლის მდგომარეობით არსებულ ვითარებას და მისი განახლება განხორციელდება ყოველკვარტალურად. მაჩვენებლის გაანგარიშებაში გამოყენებული მონაცემები მიღებულია უძრავი ქონების შეთავაზებისათვის გამოყენებულ უმსხვილეს ელექტრონულ პლატფორმებზე განთავსებულ ინფორმაციის დამუშავების შედეგად. კონკრეტულად მოცემული სიდიდე გაანგარიშებულია 5 000-ზე მეტი უნიკალური საბაზრო შეთავაზების შესახებ მონაცემზე დაყრდნობით, რომელიც თავის მხრივ შერჩეულია 6 500-მდე ერთეულიდან დუბლირებული ერთეულების გამორიცხვით. ამავდროულად გაანგარიშებაში არ არის გათვალისწინებული ზრდადობით დალაგებული მწკრივის არსებითი წყვეტის წერტილს მიღმა არსებული ერთეულები. არსებით წყვეტად მიჩნეულია ზრდადობით დალაგებულ მონაცემებში „N“ რიგითი ნომრის შესაბამის მაჩვენებელსა და „N+1“ რიგითი ნომრის მქონე მონაცემებს შორის 29 და მეტ პროცენტიანი სხვაობა. კვლევის შედეგად მიღებული ინდექსი ვაკისა და საბურთალოს შემთხვევაში შესაბამისად 0.0989 და 0.1096 პირობითი ერთეულია(Rent to Sale Index – RSI). მომავალში იგეგმება იმ ტერიტორიული ერთეულების გაფართოება, რომელთათვისაც ხორციელდება ინდექსის დაანგარიშება.

ინდექსი ვალიდურია შემდეგი დაშვებების პირობებში:

  • ფასდათმობის ნავარაუდევი წილი იდენტურია გასაყიდად და გასაქირავებლად შეთავაზებული ობიექტებისათვის, მდებარეობის, ფართისა და სართულის მიუხედავად;
  • სხვა თანაბარ პირობებში, შეთავაზებული ფასის ინფლაციური ზრდა იდენტურია გასაყიდად და გასაქირავებლად შეთავაზებული ობიექტებისათვის;
  • გასაქირავებელი ფართების შემთხვევაში მოცდენის დრო ნულოვანია;

ინდექსი, საიჯარო და გასაყიდი ფასის მიმართების ცვლილების კუთხით, ბაზარზე არსებული ზოგადი ტენდენციის შესახებ ოპერატიულ ინფორმაციას მიაწვდის ყველა დაინტერესებულ მხარეს. მაჩვენებელი განსაკუთრებით საინტერესო იქნება პირებისათვის ვისი ოპერირების ძირითად მიმართულებას უძრავი ქონების სექტორი წარმოადგენს, ისევე როგორც ბიზნეს სუბიექტებისათვის რომლებსაც საკმარისად ხშირად უწევთ გადაწყვეტილების მიღება კომერციული ფართების შეძენისა და იჯარით აღების შესახებ.

რით შეგვიძლია დაგეხმაროთ?

გვესტუმრეთ ოფისში ან გამოგვიგზავნეთ მოთხოვნა ონლაინ რეჟიმში